wos is los,
wos wüsd ma sogn?

frogt es hian
en mogn

wos frogsd so bled
DU bist es hian

wegn dia
wea ma es schpü valian

wos fia a schpü
jez schpucks scho aus

moch ned a soa
räzl draus

na, I sog das ned
du bist jo äh so gscheid

wiasdas scho meakn
mid da zeit

heasd bitte mogn
vakraumpf di ned

sog liaba um wos gähd

zjo hian, weusd di imma so
in die vanunft vabeißt

bist em du da lezte
dea wos gneißt

mogn, jez mochsd mi
laungsaum haaß

wos soi i duan
waun is ned waaß

do siechd mas wieda hian
auf di is ka valoss

du gschpiasd di ned
du redsd nua groß

du glaubst du bist so guad
und hosd ka aunung

wos si duad


auwa in dem foi
bist da deppade
du gaunz alla

weu frog en bauch
dea waaß es aa


(august 2007)

© bei da elis rotter

zu sehen in Teil 1 und 3

hier klicken

jedn tog
lieg i
mit an waunsinns mau
im bett

ea is a sunsd
aun meina seitn
ea is fuachtboa nett

er is voi schee
dabei isa no gscheid und
sooo belesn

i bin scho laung von kan
so sehr begeistad gwesn

er is total interessant
ea hod charisma
und null geheimnisse
vua mia

jo, sexi isa aa
und wia

trozdem glaubi
weri boid
mid eam
fertig sein

de frog is nua:
wöches biachl
ziagi ma
ois nächstes rein


© bei da elis rotter

(august 2007)

i moch heit kan stich
ned die geringste chance
wiea i des siech

i griag jo nedamoi a paarl zaum
so schlechte koatn
muaßt easchd haum

nua da schwoaze peda is ma gwiss
und dea gibt mia heit
aa en gstieß




PS: wos nua beim tarock wos guades is

(august 2007)

© bei da elis rotter

heit schmiad si
des schmoiz
gaunz besondas tiaf
in mei sö

de schmochtfetzn
wickln si
um mei waaches heaz

de oidn hodan
schunkln si
in mei drauriche stimmung

und de balladn
leian si
in mei weches gmiad

i glaub ned
dass aus dem obnd heit
no wos wiad



Übersetzung:

weiche stimmung...

heute schmiert sich
das schmalz
ganz besonders tief
in meine seele

die schmachtfetzen (liebeslieder)
wickeln sich
um mein weiches herz

die alten hadern (gassenhauer)
schunkeln sich
in meine traurige stimmung

und die balladen
leiern sich
in mein verletztes gemüt

ich glaube nicht
dass aus dem abend heute
noch etwas wird


(juli 2007)

© bei da elis