i hea di redn
owa wos du sogst
des geht ma ned ei

i siech di duan
owa da sinn davo
dea geht aun mia vuabei

i lies di schreibm
owa fia mi is des ois
nua gehianwixarei

und då kaunsd du
no soa
guada sei


(oktoba 2008)

© bei da elis rotter

i kreu de wänd hoch

asoa plafon
is boid eareicht

und daun foah i
duach de deckn

direkt ins freie

du kaunsd jo daweu weida
im kölla
deine leichn
eibalsamian


(septemba 2008)

wia laung muaß
a duaschtschtreckn sei
dass ma´s wossa
no dareicht

wia laung muaß
a tunnl sei
dass ma am end
no a liacht siecht

wia laung muaß
a leitung sei
bis ma meakt
dass ma drauf schtähd


imma nua so laung
wia ma söwa wü

(septemba 2008)

© bei da elis rotter

zwa viadl
host scho dalebt

jez kaunsd
deine früchte
eantn
jez wiads no amoi
so richtig
bunt
no amoi
a bissl woam
in da sunn

im leztn viadl
is da daun
numeah
koid

(septemba 2008)

© be da elis rotter

iha heats wåsi red
wissts aa mid wem
waunn und wo

iha lests meine mails
wissts aa aun wen
waunn und wieso

iha passts auf
wås i kauf
sechts
noch wås i lechz
soga am klo
kneißts iha mi å

i waaß
iha måchts eich vo mia
a richtiges büd

då hobi mi no nie
so sicha gfühd


(septemba 2008)

© bei da elis rotter

es rauschn vom meea
es tuckan vom fischaboot
kane zikadn

(septemba 2008)

© bei da elis rotter